Asturian Weird Foundation

La verdá ye que Nyago ye una cucada, siempre dormidín, cucadín col so piyamina… preciosu. Prestame pola vida.

L’Asturian Weird Foundation quier entamar güei el mes de Hello Kitty. Con ello, vamos facer homenaxe a una de les creaciones más tienres y afalagantes del mundu. Dende equí, vamos dir esti mes esbillando delles coses atopaes nel imprescindible Hello Kitty Hell y en tola rede. Pel momentu, dexámosvos esta semeya d’una rockera fan del iconu de Sanrio.

La foto ye de Benoit Derrier.

Esti día fui a la plaza y merqué, amás d’un piyama coloráu, un paquete de calcetinos de la marca Penetra. Lo d’esta firma testil castellano-manchega ye too un misteriu.

Calcetinos Penetra yá ye ún d’eses firmes mítiques nos ‘mercadillos’ de toa España, xunta los calzonciellos ‘Assman’ (Homeculu) o la ropa deportiva Kike. Pero paez que, detrás de Calcetinos Penetra hai toa una estratexa de márketing, centrada nel so envís d’epatar al cliente con un diseñu fuera de lo común. Ye un poco como la Cope, que pon sintoníes absurdes a les sos seiciones (los Bee Gees pa falar de lliteratura, por exemplu, o Ella Baila Sola pa los especiales sobre les eleiciones autonómiques). Nesti casu, Penetra dexa per claro que lo suyo son los calcetinos pa homes españoles. Y lo dexa claro cola semeya del Home Penetra y esi logo fálicu que s’adentra afiláu nuna caverna.

Calcetinos Penetra ye, amás, una empresa solidario, que acuta parte del espaciu del so etiquetao a imprentar testos con mensaxe: ‘Consuma productos europeos y salvará empleos’, diz.

Con too, xunta la marca en sí, lo que más llama l’atención de Calcetinos Penetra ye’l propio Home Penetra. ¿Quién ye esti modelu que pon la so imaxe al serviciu d’estos calcetinos? ¿Ye’l fíu del fabricante?, ¿ye’l fabricante mesmu?, ¿ye’l vendedor que batió’l récord de ventes de Calcetinos Penetra nel 93?, ¿Ye’l presidente del club de fans de Tijeritas?

Nel so honor, seya o non el presidente del club de fans d’esti grande cantante malagueñu, equí vos dexamos una de les sos actuaciones más emocionantes.

Ver darréu nel Youtube.

Hebo un tiempu en que Barriu Sésamo yera un programa infantil, en que San Francisco yera símbolu de lliberación, en que los Estaos Xuníos cellebraben el 200 aniversariu de la so independencia con inspiración lisérxica… la propaganda yá nun ye lo que yera.

Inauguramos estaya kitsh con una referencia a un blogue IMPRESCINDIBLE.

Munchos alcordaresivos de les revistes de mamá con patrones y modelos pa facevos jerseis, chaquetines o capiellines de punto pa que l’iviernu fuereis calentinos y perguapos, fechos un primor. Nesti blogue lo que faen ye esbillar lo más bizarro d’aquelles revistes, con modelos imposibles, absurdos o terroríficos.

Va tiempu ya que viera la semeya d’esti guaḥe, o guaḥa, con esti pasamontañes color carne indescriptible. Mio ma nunca nun llegó a esi estremu… de fechu, recuerdo son señaldá el jersei verde col dibuxu d’un avión pixelizáu, o la cabeza d’indiu fumando’n pipa que gastaba’l mio amigu Manuel José. Ah, qué tiempos, nos que Zara nun existía, y lo que xorrecía per toles esquines yeren tiendines del Pingüín Esmeralda.

Pues eso, que si vos presten recuerdos d’esti tipu, nel blogue esti de nome raro vais atopar semeyes a maza, modelos sesenteros y setenteros ablucantes. De tan bizarros, nun m’entra na cabeza cómo pudieron llegar a pasar los filtros de la moda. (Bueno, qué bobada, viendo lo que hai perhí nes pasareles, o lo que se pon la peña pa salir de casa…).