19 de Xineru de 2010 por Asturian Weird Foundation
Esti home a mandrecha ye Treceño. Ye abogáu, escribe dacuando en La Nueva España y fai entrevistes mui personales en Teleavilés. Ye poseedor d’un estilu mui particular, gusta-y trufar les sos entrevistes de cites erudites, con cierta querencia pol orientalismu y la ufoloxía.
Dende güei vamos dir esfoyando la so entrevista última al presidente del Principáu, Vicente Álvarez Areces, emitía pel canal avilesín na Nuechebona última. Poco enantes de qu’el rei pronunciara’l so discursu, los avilesinos podíen ver esto, que según el cartelín del principiu, y que nun llegamos a grabar, cuenta con una subvención del Principáu.
Los que vos lo perdístis, vais poder ver equí los meyores momentos. Sólo Treceño diba ser capaz de facer dicir a Areces lo que vais ver esti mes.
Esti paisanucu a manzorga ye Ricardo de Spirito Balbuena, cabezaleru máximu del movimientu Nacional Cristianu de Perú, cuya formación principal ye Fredeconsa, acrónimu de Frente de Defensa del Consumidor contra el Agio y la Usura.
Esti home ye anticomunista porque diz qu’el comunismu ye un inventu xudíu pa esparder l’ateismu. Amás de a los xudíos, odia a los chilenos, a los qu’acusa d’acombayar colos primeros pa desendolcar el sistema d’usura bancaria que sangra a los probes trabayadores de la rexón sureña peruana de Tacna.
Pela otra banda, dizse guiáu pol mensaxe de Xesucristu y de Gandhi, almira a Mussolini y hai delles coses de Hitler que tamién-y presten, anque diz que nun ye nazi, y que la so estética y la enseña, a mediu camín ente la cruz gamada y el símbolu de los marcianos de ‘V’, ye namás que pa llamar l’atención de los medios.
Anduve a la gueta de más coses d’esti personaxe bizarro onde los haya, pero paez que tanto él como’l so movimientu desapaecieran de la rede en 2007, mesmu añu nel que elli pasara unos mesinos pela cárcele por nun se qué movida d’una protesta.
Quedéme coles ganes d’averiguar si esti Führer criollo, como lu nomen nel reportaxe que vos dexo darréu, tien orixe asturianu, como se podría deducir del so apellíu Balbuena (tengo entendío qu’el Balbuena con dos ‘bes’ ye asturianu). Esi llabor déxo-ylo a la prensa provincial.
Esti post de finales de xineru nel blog del Ayalgueru fízonos pensar sobre la importancia de conocer meyor lo que comemos. Poro, entamamos güei una serie de posts dedicaos a espardir un meyor conocimientu del döner kebab, o kebap, o quebap, si mos ponemos academicistes. Dende equí vamos difundir la gastronomía kebapera asturiana, dalgunos de los meyores sitios pa xintar esta maravía gastronómica que ye muncho más de lo que paez.
Pa entamar, dalgo básicu: conocer cómo se fai esi pegollu de carne que tuesten dando-y vueltes nun aparatu asemeyáu a una estufa catalítica.
Anguaño, la mayoría destes salchichones que se comen n’Asturies tan feches n’Alemaña, onde allúgase la mayor colonia de turcos nel esterior. Una esceición ye la cadena turco-española Istanbul Döner Kebap, que fabrica los sos pinchos de carne nuna planta de Toledo depués d’introducir esta modalidá de comida rápida n’España, a finales de la década pasada.
Pero ¿qué lleven y cómo se faen? Vese n’esti videu que vos dexo darréu. Nelli vese cómo los empleaos amasen la carne picao (mui menudino, como si fuera pa salchiches de sobre) y faen boles que se van colocando una sobro otra nel pinchu. Entemedies, ponen una tira de carne ‘de verdá’, un filetín polo xeneral. La masa, polo que cuenta na so web la empresa Karmez, una de les principales productores d’Europa, ye un mecíu de carne de xatu y vaca, con especies secretu de la casa.
Depués, ya fechu el pegollu, se-y da forma, envuélvese y se ultraconxela pa distribuyilu per tol continente.
Calca equí p'amosar conteníu dende YouTube. Consulta la política de privacidá de YouTube.
A mediaos de los ochenta, les discográfiques de toa Europa yá teníen mecíos nos sos turmix tolos ingredientes sonoros que foro surdiendo nos años anteriores. Ello permitió l’apaición d’un estilu non propiamente italianu, sinon de toa Europa ya incluso del otru lláu de la mar.
Un exemplu ye esti Baltimora, un proyeutu musical italianu, pero con esti rapazu norirlandés, Jimmy McShane, como cabezaleru. El so cantar ‘Tarzan boy’ convirtióse nun de los mayores ésitos de 1985 y dexaba pernidio cómo diba sonar el tecnopop nos años qu’entraben.
Lo que bien lluéu diba recibir etiquetes como ‘Italo disco’ o ‘Euro dance’, ente otres, confirmábase como too un fenómenu con personalidá propio, un productu pop netamente européu que, a poco y a poco, diría perdiendo orixinalidá ya interés pa morrer como tantos otro productos masuñaos y peresplotaos poles grandes discográfiques.
Calca equí p'amosar conteníu dende YouTube. Consulta la política de privacidá de YouTube.
Cambiando de tema…
Avisóme Pingarates d’esta semeya… diba ser una pena non ponela porque ya pasara el mes Hello Kitty, asina qu’equí ta:
En 1983, tres de l’asociación del dúu formáu por Stefano Rota y Stefano Righi (de Righi, Righeira, ‘portuguesizáu’, dicen) colos hermanos La Bionda, surde’l primer gran ésitu internacional del Italo Disco. Hasta entós, hebo ésitos, nun digo que non, pero el ‘Vamos a la playa’, auténtica obra maestra del techno pop, del ensame Righeira-La Bionda, afitó les bases de lo que diba ser el Italo Disco d’ellí a un par d’añinos, ya con un soníu y una estética más afitada y compartida por artistes non sólo italianos, sinon de toa Europa ya incluso d’Estaos Uníos (anque fuera pola influencia italo-americana).
El casu ye que los Righeira (lleer Rigueira), son entá güei unos ídolos pa munchos nostálxicos, caltienen nes sos actuaciones d’anguaño l’espíritu desvegoñáu d’aquellos años de ‘Vamos a la playa’, ‘No tengo dinero‘ (casualmente los dos grandes ésitos internacionales de so son en castellanu, depués llegaría ‘Compañero’, ‘La música electrónica’ y otros), ‘L’estate sta finendo‘ o ‘Innamoratissimo‘
Calca equí p'amosar conteníu dende YouTube. Consulta la política de privacidá de YouTube.
La verdá ye que Righeira ye de lo más divertíu que se pue atopar d’un subxéneru que, dacuando, vuélvese una migayina cursi hasta lo pegañosu. Por cierto, nun vos perdáis la so web… puru friquismu teunopop.
Pino d’Angiò ye un iconu. Pa mio idea, ye elli quien define cola so presencia l’Italo Disco más auténticu: ironía, actitú molona y chuleta, cantares cenciellos y pegañosos más que pegadizos… Ye puru disfrute y diversión.
Esti pompeyanu de nome Giuseppe Chierchia ye conocíu mundialmente pol so ésitu ‘Ma quale idea’, de cuyes rentes sigui viviendo entá esti home. Ye, de fechu, una de les llestres más elaboraes y celebres non ya del Italo Disco, sinon del disco, el funky mundial. Un poco a rebufu de Shaft, ‘Ma quale idea’ ye la cume artística d’un home que ya vinía ufiertando ironía dende años atrás, con cantares menos conocíos nel resto d’Europa y más ‘poperos’ pero realmente prestosos como ‘Fammi un panino’ (¿Faime un bocata?) y la rellumante ‘Un concerto da Strapazzo’, dambes perprestoses, daveres.
Nesti videu, vos dexo l’aggiornamento de ‘Ma quale Idea’ que restolaron en comuña l’arxentinu dj Kun y el propio Pino D’Angiò. L’adaptación paezme afayadiza, caltién l’espiritu coñón y vese buen rollu ente los dos artistes. Mola.
Hai más adaptaciones, como la de Flaminio Maphia, qu’algamó va unos añinos un bultable ésitu n’Italia, anque a mín paezme más una caricatura qu’una versión que caltenga’l tonu orixinal. Nin tampoco podemos escaecer el sampleáu fechu por Madison Avenue pal so cantar ‘Don’t call me baby’, que sonara abondo va un tiempu.
Si bien los La Bionda son los pas del Italo Disco, lo cierto ye que nun se-y pue negar la influencia que tuvo, y caltién, el gran compositor, productor y intérprete italianu Giorgio Moroder. Esti home ye ún de los dioses, non yá del Italo Disco, sinon que tamién lo ye del Disco con toles lletres. Na so web podéis atopar la bultable llista d’estrelles setenteres y ochenteres a les que produzo, y les bandes sonores que firma. De dalguna manera, Moroder ye l’talianu nel que se fixaben los demás, la guía pela que desenvolver l’estilu, les téuniques que bien lluéu diben dar llugar al Italo Disco.
Ye impagable esti videu promocional, nel que desplica delles posibilidaes de la entá naciente música electrónica.
Estos dos paisanos son La Bionda, AKA ‘D.D. Sound’. Carmelo y Michelangelo La Bionda foron dos visionarios, dos flipaos que nalaben ente soníos electrónicos, la música de la Motown y el gustu pol esquiyama de los setenta hasta convertise en unos de los músicos más molones de la so época. Col tiempu, foron dando-y forma’l so estilu y abriendo puertes a otros italianos que se sumaben a la moda disco Italia. Acabaríen como productores nos ochenta, detrás de los más grandes ésitos del xéneru col dúu Righeira. Anguaño dizse que rexenten unos estudios de grabación en Milán. Equí tenéis un exemplu de la so música: el so grande succeso ‘One for you, one for me’.
Calca equí p'amosar conteníu dende YouTube. Consulta la política de privacidá de YouTube.
28 de Febreru de 2009 por Asturian Weird Foundation
Y con esti post vamos piesllar el mes Hello Kitty de la Asturian Weird Foundation: falando de la Hello Kitty nun, obra del artista pop uruguaxo Martín Sastre.
La historia de la ‘Hello Kitty nun’ a la que fizo referencia l’ayalgueru va unos díes, ye la de la ‘performans’ que se montó Martín Sastre pa llamar l’atención del so programa ‘Apadrina a un artista latinoamericano’ de la so fundación en favor de los artistes superprobes. La cosa foi que un paisa, antroxáu de monxa Hello Kitty, llantóse delantre la casa de Madonna en Londres pa dexar nidio que Madonna ye una artista llatinoamericana y que, per ende, ye bona idea apadrinar artistes llatinoamericanos.
El casu ye que Martín Sastre, que caltién esa fundación pol arte superprobe, ye un peazo d’artista que mos dexa videos como los que tien n’amuesa nel so web, y que respuende a dalgo tan cenciello como que la muerte de Lady Di, la boda del príncipe Charles y la muerte de Rainiero, ente otros fechos históricos, nun son cosa de la casualidá.
Esti Martín Sastre vien de facese, de fechu, un videu pa Fangoria, que vien paez que lu apadrinó con gustu.
15 de Febreru de 2009 por Asturian Weird Foundation
Hai que ser mui chungu pa facete esto. Soi tu padre y, dela que llegues a casa, vas pa la cama col culu como un tomate. Cagonrós, gastar les perres d’esta manera…
Esti home a mandrecha ye Treceño. Ye abogáu, escribe dacuando en La Nueva España y fai entrevistes mui personales en Teleavilés. Ye poseedor d’un estilu mui particular, gusta-y trufar les sos entrevistes de cites erudites, con cierta querencia pol orientalismu y la ufoloxía.
Esti paisanucu a manzorga ye Ricardo de Spirito Balbuena, cabezaleru máximu del movimientu Nacional Cristianu de Perú, cuya formación principal ye Fredeconsa, acrónimu de Frente de Defensa del Consumidor contra el Agio y la Usura.
Estos dos paisanos son La Bionda, AKA ‘D.D. Sound’. Carmelo y Michelangelo La Bionda foron dos visionarios, dos flipaos que nalaben ente soníos electrónicos, la música de la Motown y el gustu pol esquiyama de los setenta hasta convertise en unos de los músicos más molones de la so época. Col tiempu, foron dando-y forma’l so estilu y abriendo puertes a otros italianos que se sumaben a la moda disco Italia. Acabaríen como productores nos ochenta, detrás de los más grandes ésitos del xéneru col dúu Righeira. Anguaño dizse que rexenten unos estudios de grabación en Milán. Equí tenéis un exemplu de la so música: el so grande succeso ‘One for you, one for me’.
