Asturian Weird Foundation

A les recomendaciones del ayalgueru podemos sumar milenta prebes de la aportación del kebab a la cultura popular occidental d’anguañu. Un exemplu ye esti cantar danés dedicáu al döner y a otres delicies.

Esti post de finales de xineru nel blog del Ayalgueru fízonos pensar sobre la importancia de conocer meyor lo que comemos. Poro, entamamos güei una serie de posts dedicaos a espardir un meyor conocimientu del döner kebab, o kebap, o quebap, si mos ponemos academicistes. Dende equí vamos difundir la gastronomía kebapera asturiana, dalgunos de los meyores sitios pa xintar esta maravía gastronómica que ye muncho más de lo que paez.

Pa entamar, dalgo básicu: conocer cómo se fai esi pegollu de carne que tuesten dando-y vueltes nun aparatu asemeyáu a una estufa catalítica.

Anguaño, la mayoría destes salchichones que se comen n’Asturies tan feches n’Alemaña, onde allúgase la mayor colonia de turcos nel esterior. Una esceición ye la cadena turco-española Istanbul Döner Kebap, que fabrica los sos pinchos de carne nuna planta de Toledo depués d’introducir esta modalidá de comida rápida n’España, a finales de la década pasada.

Pero ¿qué lleven y cómo se faen? Vese n’esti videu que vos dexo darréu. Nelli vese cómo los empleaos amasen la carne picao (mui menudino, como si fuera pa salchiches de sobre) y faen boles que se van colocando una sobro otra nel pinchu. Entemedies, ponen una tira de carne ‘de verdá’, un filetín polo xeneral. La masa, polo que cuenta na so web la empresa Karmez, una de les principales productores d’Europa, ye un mecíu de carne de xatu y vaca, con especies secretu de la casa.

Depués, ya fechu el pegollu, se-y da forma, envuélvese y se ultraconxela pa distribuyilu per tol continente.

L’Italo disco ye una etiqueta que nun siempre inclúi artistes italianos. Hai una conexón americana citada aquí nel post de Giorgio Moroder, y sobre too alemana. De fechu, comuunmente s’idetifiquen como reis del Italo Disco a grupos d’un país que dio al mundu a Boney-M.

Lo cierto ye que l’Italo disco, llueu eurodance, ye la verdadera banda sonora de la Unión Europea, la gran obra cultural común. Una amuesa ye Fancy, cantante alemán que nos ufre esti cantar d’inspiración española col inequívocu estilu del tecnopop de la época. Alcordaivos de Righeira, nome que vien de portuguesizar l’apellíu d’un de los cantantes, que son italianos y que se fixeron famosos nel continente cantando en castellanu.

Nel casu de Fancy, tamos falando d’un de los más respetaos artistes del xéneru, al que’entá podeis atopar n’espectáculos señardosos. La so web tien puntos impagables.

Esti d’embaxo sea, posiblemente, la so pieza más recordada nel conxuntu d’Europa, anque los sos fans tamién faen coros a ‘Flames of love‘.

A mediaos de los ochenta, les discográfiques de toa Europa yá teníen mecíos nos sos turmix tolos ingredientes sonoros que foro surdiendo nos años anteriores. Ello permitió l’apaición d’un estilu non propiamente italianu, sinon de toa Europa ya incluso del otru lláu de la mar.

Un exemplu ye esti Baltimora, un proyeutu musical italianu, pero con esti rapazu norirlandés, Jimmy McShane, como cabezaleru. El so cantar ‘Tarzan boy’ convirtióse nun de los mayores ésitos de 1985 y dexaba pernidio cómo diba sonar el tecnopop nos años qu’entraben.

Lo que bien lluéu diba recibir etiquetes como ‘Italo disco’ o ‘Euro dance’, ente otres, confirmábase como too un fenómenu con personalidá propio, un productu pop netamente européu que, a poco y a poco, diría perdiendo orixinalidá ya interés pa morrer como tantos otro productos masuñaos y peresplotaos poles grandes discográfiques.

Cambiando de tema…

Avisóme Pingarates d’esta semeya… diba ser una pena non ponela porque ya pasara el mes Hello Kitty, asina qu’equí ta:

En 1983, tres de l’asociación del dúu formáu por Stefano Rota y Stefano Righi (de Righi, Righeira, ‘portuguesizáu’, dicen) colos hermanos La Bionda, surde’l primer gran ésitu internacional del Italo Disco. Hasta entós, hebo ésitos, nun digo que non, pero el ‘Vamos a la playa’, auténtica obra maestra del techno pop, del ensame Righeira-La Bionda, afitó les bases de lo que diba ser el Italo Disco d’ellí a un par d’añinos, ya con un soníu y una estética más afitada y compartida por artistes non sólo italianos, sinon de toa Europa ya incluso d’Estaos Uníos (anque fuera pola influencia italo-americana).

El casu ye que los Righeira (lleer Rigueira), son entá güei unos ídolos pa munchos nostálxicos, caltienen nes sos actuaciones d’anguaño l’espíritu desvegoñáu d’aquellos años de ‘Vamos a la playa’, ‘No tengo dinero‘ (casualmente los dos grandes ésitos internacionales de so son en castellanu, depués llegaría ‘Compañero’, ‘La música electrónica’ y otros), ‘L’estate sta finendo‘ o ‘Innamoratissimo‘

La verdá ye que Righeira ye de lo más divertíu que se pue atopar d’un subxéneru que, dacuando, vuélvese una migayina cursi hasta lo pegañosu. Por cierto, nun vos perdáis la so web… puru friquismu teunopop.

Pino d’Angiò ye un iconu. Pa mio idea, ye elli quien define cola so presencia l’Italo Disco más auténticu: ironía, actitú molona y chuleta, cantares cenciellos y pegañosos más que pegadizos… Ye puru disfrute y diversión.

Esti pompeyanu de nome Giuseppe Chierchia ye conocíu mundialmente pol so ésitu ‘Ma quale idea’, de cuyes rentes sigui viviendo entá esti home. Ye, de fechu, una de les llestres más elaboraes y celebres non ya del Italo Disco, sinon del disco, el funky mundial. Un poco a rebufu de Shaft, ‘Ma quale idea’ ye la cume artística d’un home que ya vinía ufiertando ironía dende años atrás, con cantares menos conocíos nel resto d’Europa y más ‘poperos’ pero realmente prestosos como ‘Fammi un panino’ (¿Faime un bocata?) y la rellumante ‘Un concerto da Strapazzo’, dambes perprestoses, daveres.

Nesti videu, vos dexo l’aggiornamento de ‘Ma quale Idea’ que restolaron en comuña l’arxentinu dj Kun y el propio Pino D’Angiò. L’adaptación paezme afayadiza, caltién l’espiritu coñón y vese buen rollu ente los dos artistes. Mola.

http://www.youtube.com/watch?v=t5IdVZ4VQGA

Hai más adaptaciones, como la de Flaminio Maphia, qu’algamó va unos añinos un bultable ésitu n’Italia, anque a mín paezme más una caricatura qu’una versión que caltenga’l tonu orixinal. Nin tampoco podemos escaecer el sampleáu fechu por Madison Avenue pal so cantar ‘Don’t call me baby’, que sonara abondo va un tiempu.