Esti rapaz ye Mohammad Rafiqul, uviéin de Bangladesh que trabaya na capital asturiana faciendo bocates y rulos de Döner Kebap. Na entrevista que-y tan acabantes de facer nel diariu El Comercio desplica les diferencies ente’l kebab gochu, de carne picao fecho n’Alemaña que comemos equí, y el estupendu döner fechu de filetinos unu enriba d’otru, con dalguna verdurina y especies pel mediu, cortáu con cuchiellu y non con esi cortapelo col que faen equí eses tires de carne tostada qu’acompanguen tan bien con eses salses tan riques.
En fin, que too un profesional, desplicando los secretos del döner kebap asturianu. Eso sí, el primero que-y eche chimichurri al kebap, se forra.
Eso ye lo que dicen dellos blogues perhí. El döner kebab más grande del mundu ye griegu. Esti de la semeya ye un ‘giros’, versión griega del turcu döner kebab qu’emplea carne de gochu, fechu pol ‘chef’ Costas Dasios. De fechu, ‘gyros’ ye’l nome de la bocatería que, si nun m’equivoco, introduzo’l döner n’Asturies, na xixonesa zona de Fomento, va unos añinos.
El casu ye que Costas Dasios fizo un döner de 1.850 kilos y 1,7 metros d’altor. Pa facer munchos platos y bocatas con elli.
Nel Reinu Uníu hai entá dalgo más gochu que les pringles: los ‘Pot Noodles‘. Son una especie de fideos con sabores molones pa comer ente hores. Ente los sabores molones, nun podía faltar el sabor a döner kebab, última creación de los llaboratorios Pot Noodles. La cosa ye que namás echando agua caliente nel bote, tienes tus fideos con sabor a kebap. Como diz ún de los directivos de la firma al prestixosu diariu The Sun: “Sabemos que los homes amen un buen kebab, tanto como los Pot Noodle, por eso combinamos los dos pa crear ‘the ultimate man food snack’ (nun m’atrevo a tornar frase tan cool).”
A les recomendaciones del ayalgueru podemos sumar milenta prebes de la aportación del kebab a la cultura popular occidental d’anguañu. Un exemplu ye esti cantar danés dedicáu al döner y a otres delicies.
Esti post de finales de xineru nel blog del Ayalgueru fízonos pensar sobre la importancia de conocer meyor lo que comemos. Poro, entamamos güei una serie de posts dedicaos a espardir un meyor conocimientu del döner kebab, o kebap, o quebap, si mos ponemos academicistes. Dende equí vamos difundir la gastronomía kebapera asturiana, dalgunos de los meyores sitios pa xintar esta maravía gastronómica que ye muncho más de lo que paez.
Pa entamar, dalgo básicu: conocer cómo se fai esi pegollu de carne que tuesten dando-y vueltes nun aparatu asemeyáu a una estufa catalítica.
Anguaño, la mayoría destes salchichones que se comen n’Asturies tan feches n’Alemaña, onde allúgase la mayor colonia de turcos nel esterior. Una esceición ye la cadena turco-española Istanbul Döner Kebap, que fabrica los sos pinchos de carne nuna planta de Toledo depués d’introducir esta modalidá de comida rápida n’España, a finales de la década pasada.
Pero ¿qué lleven y cómo se faen? Vese n’esti videu que vos dexo darréu. Nelli vese cómo los empleaos amasen la carne picao (mui menudino, como si fuera pa salchiches de sobre) y faen boles que se van colocando una sobro otra nel pinchu. Entemedies, ponen una tira de carne ‘de verdá’, un filetín polo xeneral. La masa, polo que cuenta na so web la empresa Karmez, una de les principales productores d’Europa, ye un mecíu de carne de xatu y vaca, con especies secretu de la casa.
Depués, ya fechu el pegollu, se-y da forma, envuélvese y se ultraconxela pa distribuyilu per tol continente.
Calca equí p'amosar conteníu dende YouTube. Consulta la política de privacidá de YouTube.
