Asturian Weird Foundation

La repuesta ye ‘dafechu non’ (digo yo), pero rescampla que lo primero que fizo Beneditu XVI al aportar a los Estaos Xuníos fuere pidir perdón polos casos de cures pederastes. (Cuenten qu’hai al rodiu de diez mil víctimes d’abusos sexuales a manos de cures católicos nesi país, y que foi Ratzinger, enantes de mutar en Beneditu, ún de los cabezaleros vaticanos que más torgues punxo a la investigación del asuntu).

El casu ye que, restolando pela Internet pedófila, atopéme con que NAMBLA existe. Yo pensaba que yera un inventu de los de South Park, que na versión española camudaben el sentíu de les sigles orixinales de l’asociación na que quería ingresar Eric Cartman como ‘Niños, Aman a Maricas, Bonita Libertad Americana’; cuando en realidá ye ‘North American Man/Boy Love Association’, y esiste. Ye un sindicatu pedófilu de verdá.

Según viera perhí, esta hestoria del NAMBLA naz venceyáu al esporpolle del movimientu gay de San Francisco nos 70, y clamaben pola llegalización de les relaciones sexuales con menores consentíes. Diben d’abanderaos de la llibertá sexual, como si la igualdá nun fuera condición necesario pala llibertá. El casu ye qu’al movimientu de lliberación gay acabó separtándose d’esta xente, que llegó formar parte, pente una década, d’una Internacional Gay.

Pero NAMBLA ye’l casu más conocío de sindicatu pedófilu, pero non l’únicu. Hailos per tol Internet y per tol mundu, y apurren ‘servicios’ como campamentos de branu pa guaḥes, boletines informativos, y mapes del mundu nos que s’informa de les edaes mínimes pa caltener relaciones sexuales consentíes con menores nos estremaos países. Va un tiempu, incluso hubo un partíu pedófilu n’Holanda que, a la fin, nun llegó a presentase a les elleiciones.

Esti artículu espublizose 'l 18 d'Abril de 2008 a les 14:44 y ta guardáu en Parafilies.
Puedes tar al corriente de los comentarios d'esti artículu gracies al feed RSS 2.0. Los comentarios y los trackbacks tan zarraos.