Asturian Weird Foundation

Via Yetube (me paez) enterámonos de la esistencia de turrebruno y sus videos fake. Miguel Bose canta por Vicente Díaz, Alejandro Sanz por La Pastorina… ye como lo del Will Smith enfiléu, y fai risa.

Brian Peppers, pal que nun lo conoza, ye esti paisanu qu’apaez a manzorga. Dende la so apaición n’internet acullá pel 2005, tien inspirao abondes creaciones que faen más o menos gracia, que lu convirtieron nun fenómenu viral de primer orde, y tamién ún de los más políticamente incorreutos por mor de que na mayoría los casos trátase de facer chancies d’un home enfermu.

Conocíu como l’home más feu del mundu, cuerren perhí abondes esplicaciones a la so deformidá, y versiones estremaes de cómo apaeció la so semeya (agora esborrada) nel rexistru públicu de molestadores sexuales del so estáu de nación (Ohio). Dende entós p’acá, Peppers tien protagonizao dellos YTMND, dende esti que ye’l primeru, hasta otros más curraos con gifs animaos y la so propia banda sonora.

Sicasí, la fiebre Brian Peppers vien amenorgándose y surden los llamaos al respetu a esti home que, sigún cuenten nesti YTMND (La verdá so Brian Peppers), nun merez tantu escarniu.

El tuning ye maraviosu. ‘Asturies ye tuning’, diz una peña de tuneros pravianos (me paez). Y lo cierto ye que mola ver cómo caún fai del so coche una estensión de sí mesmu. Básicamente, el coche tuneáu ye’l reflexu del propietariu. Hailos a los que-yos presta mirar más pal interior, y gasten más perres en centralites y manguitos, en potenciar el motor… Otros son más elegantes, y opten por pequeños retoques estéticos y mecánicos que fain de la so máquina dalgo más averáu al esclusivu megapepino que yos hubiere prestao diseñar. Otros, prefieren que la peña quede ablucada al so pasu, y entós convierten el so utilitariu de gasolina nun albuertu dignu de les pistes d’Autosport Suárez.

Estos últimos son los más prestosos… son los que van darréu pal Feuvert o la seición d’automóvil del Eroski en cuantes qu’aparquen nel Parque Principado. Enllenen el coche de pegatines cromaes y queden hipnotizaos con cualisquier trebeyu que lleve la palabra NEON en dalgún llau.

Hai un clásicu na rede que rinde homenaxe a esti tipu de tuning al que los aficionaos llamen truñing.  Una visita a Cutre Tuning son unes cuantes rises garantizaes.

Pero lo que ya ye una vuelta de tuerca son negocios como los d’esti paisa d’Arizona que vende, a 100 dólares, un artefautu patentáu qu’asemeya a la llave de los artículos de cuerda, ya fueren xuguetes o  relós despertadores.

Dalgún que otro aventáu pue tar agora percorriendo carreteres con esti dispositivu, la WindUpKey, que se mueve pa simular que’l to coche ye de coña. Esto ye, lo que se llama, I+D+i. Con croquis d’instalación y too. Una pasada.

Non, nun voi falar equí de milicos asesinos arxentinos sinon de la Triple A mexicana: posiblemente, la lliga de wrestling más friqui que te pueas echar a la cara.

Si el Conseyu Mundial de la Llucha (CMLL) ye la primer división de la llucha llibre circense en México (d’au saliera Rey Misterio, el de la WWE, y na que combate nuestru Asturiano), la Triple A ye dalgo asina como la serie B d’esti tipu de shows. Con tres grandes eventos al añu, tienen en nómina un garrapiellu de lluchadores y edecanes (azafates) de los más ablucante.

Na semeya d’enriba podeis contemplar la forma física de Brazo de Plata. Pero lo más espectacular son los lluchadores ‘exóticos’, que ye la manera que tien la triple AAA de llamar a los sos luchadores travestis. Equí vos dexo dos exemplos: May Flower y Cassandro,anque hai dalgún más perhí, como Pimpinela Escarlata, de la que nun atopé semeyes. Más información, na páxina de la Triple A.

Cuatro rapazos faen playback d’un cantar de lo que paez ser el Skama la rede, Skontra, Dixebra o Oi! n’ast de la China, nun sé si de la popular o de la otra. Entitúlase ‘El socialismu presta’, y cuando nel videu faen como que-y zumben a ún d’ellos ye porque’l cantar diz dalgo asina como ‘combatir al reaccionariu’.

Imaxino una sesión de ‘brainstorming’ pa montar un restorán. ¿Que ye lo que más-yos presta a los homes? El fútbol. ¿Y qué más? Tetes grandes. ¿Y qué mas? Comida abundante y cerveza. ¿Dalgo más? Los grandes éxitos del rock de tola vida. Ok, ya tenemos tema.

Y asina debio ñacer Hooters, la cadena de camareres en camiseta tirantes y grandes tetes que fain el mongol mientres sirven raciones d’esguiles empanaes, hamburgueses y mierda precocinada. Too ello nun restorán ‘temáticu’ con música al altu la lleva y descomanaes pantalles TFT o plasma que namás sintonicen canales deportivos. El paraisu gastronómicu americanu. Va unos meses abrieron el so primer restorán n’España, en Tenerife. Diben abrir tamién en Sevilla y BCN, pero paez que nun-yos ta saliendo tan bien la cosa como esperaben. A ver pa cuando en Parque Principado. Diba ser un planazo: pases pel Ikea, comes cola familia, eches una partida de bowling, y depués pal Model’s.

Impagable el videu esti de les camareres del Hooters de Tenerife faciendo’l baille ‘del conejito’.

Y pal que nun lu vea, que calque equí.

Suel tener la etiqueta de ‘la peor película de terror del mundu’, y nun debe andar lloñe. Tien un toque giallo, con pinceladinas sexuales, pezones al aire a puntu de morrer y coses asina. El trailer dura cinco minutos, les interpretaciones faen rir y tien lleenda: dicen que se filmó nel 79 y nun se pudo estrenar hasta’l 83 por mor de problemes nel llaboratoriu nel que se procesaba, polo que’l direutor fizo un montaxe nuevu con narrador (nada más cutre) pa la estrena. A night to dismember ye exploitation n’estáu puru, d’esi qu’imita Pedro (Kárate a muerte en Torremolinos, Psycho-lettes) Temboury. Interesante, pa tolo que tien que ver con exploitation, el wiki VideoUnderbelly.

Si nun lu ves calca equí.

Ya que tamos de campaña, dexémonos llevar por esta fola democrática que mos invade sintiendo una opción descoyonante. España 2000, pal que nun lo sepa, ye un partíu de Valencia patriota-bacaladero, cuyo presidente (esti a manzorga) ye amás cabezaleru d’una patronal de puticlús o dalgo asina. Pues bien, diendo perhí atopé esti videu impagable… un mitin ensin censura de la plana mayor d’esti partíu  en la  bizarra ciudá de Benidorm. Dende’l primer momentu ye flipante’l nivel d’esta peña… “E’paña”, diz una presentadora con pinta d’haber construyío’l so pensamientu ideolóxicu nuna sala de videoxuegos. Lluéu vienen un par de tipos rapaos, que casi nun acierten a lleer el foliu que tienen delantre, y echa’l pieslle, cómo non, el lider máximu esti, que  ye too un célebre. Yá quixera Gabino dicir coses como: “hay palabras que significan distinto segun la persona, no es lo mismo la palabra rosa para un jardinero que para un marica” (rises y aplausos de los presentes).

Y qué dicir de la escenografia… impagable. Val mas que lu veais.

Perdióse'l enllaz

Si nun lu ves, calca equí.

La verdá ye qu’un instrumentu como’l ceremín paez fechu pal bizarrismu. Y Thomas Grillo ye la demostración. Tou un virtuosu d’esti instrumentu que se toca ensin tocalu. Grillo pon clases dende la so web de como tocalu, y fai espectáculos tan bizarros como’l que dexo darréu, o como esti, más patrióticu.

Col tema esti de les parafilies y el fetish, toi acabante de descubrir el fascinante mundu de l’acrotomofilia y l’apotemnofilia. Entrambes les dos son variaciones d’una mesma especialidá fetichista basada n’atracción polos amputaos, xeneralmente poles amputaes. La primera, define a quienes-yos presta ver, tocar y desear muyeres a les que-yos falta una pierna, les manes, un brazu… Los apotemnofílicos (o ‘wannabes’), son los que sienten una necesidá sexual imperiosa d’amputase dalgo, a quienes-yos escita enforma la idea.
El caso ye qu’esto ye munchu más complexu que’l tema del estrapalle de bichos, que cinca colo voyeur…
Como pasara con otres filies, el fetichismu pro-mancu conoció un esporpolle bultable gracies a internet. Allá pelos 80, los acrotomófilos yeren más bien xente raro qu’escucaba mancos y tullíos peles cais. Agora non. Agora hai muñeques hinchables amputaes, axencies matrimoniales qu’ufren a homes solventes relación con dispuestes muyeres ruses, casaderes y a les que-yos falta dalgún cachu, clubes que venden DVD’s y semeyes de muyeres amputaes sexis, grupos de noticies qu’entamen convenciones añales… Too un mundu pa un placer distintu.