Unboxing carambelu n’esprai de Hello Kitty
Ya diera anuncia va unos post de que díbemos facer un unboxing de la Hello Kitty’s cacía que ta a la venta n’estes selmanes nos quioscos. Pero la verdá ye que ún fascículu d’esos cuesta diez euros, asina que dexelu pa prau. Sicasí, nel quioscu atopé güei el carambelu n’esprai de Hello Kitty, cuesta un euro y ye la única llambiotada que conozo que vien con manual d’instrucciones.
Equí ta presentáu el inventu. Ye similar a los esprais antiviolación, dalgo más grandes qu’esos que hai pal fedor d’aliendu. Como veis, ta mercáu esti fin de selmana n’Asturies. (Nun penséis que m’aprovecho de otros unboxings que pudiera pillar nel flickr).
Como vos decía, el carambelu n’esprai de Hello Kitty vien con un manual d’instrucciones xuncíu con una goma al bote.
Esti ye el manual, nel que despliquen que nun se pue empobinar l’esprai a los güeyos, y que esta llambiotada tien que se usar siempre embaxu la supervisión d’un adultu.
Llugar nel que rasgar el plástique qu’endolca tol envase. Obsérvese el sellu de Sanrio na parte superior, que confirma que ye un productu oficial Hello Kitty.
Anque lo paez el principiu, la verdá ye que nun ye complicáu d’abrir.
Preparáu pal so usu.
Anque nun tenía nengún adultu a mano pa que me supervisara, llancéme a prebar l’inventu. Sabe a mazana ácido, mui recomendable.
