De mientres les estrelles masculines facíen gala d’amaneramientu pa volver lloques a millones d’adolescentes en toa Europa, apaecía a finales de los ochenta un fenómenu que fizo vender millones de discos. Sabrina Salerno y el so tontorrón ‘Boys boys boys’ inspiraron millones de nueches solitaries en tol continente. Entamaba con ella el fenómenu de les ‘tit-stars’, nel que compitió cola británica Samantha Fox (que diba de seria) y cola polaca Danuta (que diba de lo que diba).
Pero el fenómenu más auténtico foi el de la estrábica Sabrina Salerno, qu’entá güei ta acabante de sacar un discu y entamar una nueva xira per media Europa, fecha ya una cuarentona reultona. Sicasí, equí vamos recordala ximelgando’l culín y les tetes nel cantar ‘My Chico’, nun ye ‘Boys, boys, boys‘, pero ye que’l videu ye impagable.
El pasu’l tiempu y la turmix de les grandes discográfiques afitó una estética Italo Disco mui venceyada a lo que lluéu diba considerase ‘cultu gay’. El ‘macho’ de la disco mutaba agora nun sexy sensiblón fechu de ternascu que susuriaba a les adolescentes mientres ximelgaba’l culín. L’Italo Disco pasó del bigotón de La Bionda a la pluma de Den Harrow nun tris, como Travolta pasara de ser el machote italianu de la ‘Febre del sábadu nueche’ al bailarín con malles y pinta chaperín incipiente na espantible ‘Stayin’ alive’.
En bien de casos, como’l cantante y bailarín de Baltimora, los propios artistes son ‘openly gay’. N’otros, namás son obxetos d’una estética masuñada pola calenturienta mente d’un productor artísticu.
Un casu peculiar ye’l de Den Harrow, marca artística ideada polos productores Roberto Turatti y Miki Chieregato que corporeizaba el bailarín y cantante Stefano Zandri, pero al que-y ponía voz en la mayoría de los cantares l’americanu Tom Hooker, no que foi un antecedente evidente de Milli Vanilli. Zandri punxo voz tamién a dellos cantares, como tamién lo fixera Chuck Rolando, que ye a quien se siente (wikipedia dixit) nel cantar que vien darréu. Nun vos perder la coreografía y el look que mos gasta.
La verdá ye que la voz-y pega al Stefano Zandri como la de Carmen de Mairena a la princesa Letizia. Por cierto, paez que’l nome de Den Harrow tien un puntu d’ironía, y ye que lleíu por un italianu fonéticamente: ‘Den-arou’, suena a dineru.
A mediaos de los ochenta, les discográfiques de toa Europa yá teníen mecíos nos sos turmix tolos ingredientes sonoros que foro surdiendo nos años anteriores. Ello permitió l’apaición d’un estilu non propiamente italianu, sinon de toa Europa ya incluso del otru lláu de la mar.
Un exemplu ye esti Baltimora, un proyeutu musical italianu, pero con esti rapazu norirlandés, Jimmy McShane, como cabezaleru. El so cantar ‘Tarzan boy’ convirtióse nun de los mayores ésitos de 1985 y dexaba pernidio cómo diba sonar el tecnopop nos años qu’entraben.
Lo que bien lluéu diba recibir etiquetes como ‘Italo disco’ o ‘Euro dance’, ente otres, confirmábase como too un fenómenu con personalidá propio, un productu pop netamente européu que, a poco y a poco, diría perdiendo orixinalidá ya interés pa morrer como tantos otro productos masuñaos y peresplotaos poles grandes discográfiques.
Calca equí p'amosar conteníu dende YouTube. Consulta la política de privacidá de YouTube.
Cambiando de tema…
Avisóme Pingarates d’esta semeya… diba ser una pena non ponela porque ya pasara el mes Hello Kitty, asina qu’equí ta:
En 1983, tres de l’asociación del dúu formáu por Stefano Rota y Stefano Righi (de Righi, Righeira, ‘portuguesizáu’, dicen) colos hermanos La Bionda, surde’l primer gran ésitu internacional del Italo Disco. Hasta entós, hebo ésitos, nun digo que non, pero el ‘Vamos a la playa’, auténtica obra maestra del techno pop, del ensame Righeira-La Bionda, afitó les bases de lo que diba ser el Italo Disco d’ellí a un par d’añinos, ya con un soníu y una estética más afitada y compartida por artistes non sólo italianos, sinon de toa Europa ya incluso d’Estaos Uníos (anque fuera pola influencia italo-americana).
El casu ye que los Righeira (lleer Rigueira), son entá güei unos ídolos pa munchos nostálxicos, caltienen nes sos actuaciones d’anguaño l’espíritu desvegoñáu d’aquellos años de ‘Vamos a la playa’, ‘No tengo dinero‘ (casualmente los dos grandes ésitos internacionales de so son en castellanu, depués llegaría ‘Compañero’, ‘La música electrónica’ y otros), ‘L’estate sta finendo‘ o ‘Innamoratissimo‘
Calca equí p'amosar conteníu dende YouTube. Consulta la política de privacidá de YouTube.
La verdá ye que Righeira ye de lo más divertíu que se pue atopar d’un subxéneru que, dacuando, vuélvese una migayina cursi hasta lo pegañosu. Por cierto, nun vos perdáis la so web… puru friquismu teunopop.
Pino d’Angiò ye un iconu. Pa mio idea, ye elli quien define cola so presencia l’Italo Disco más auténticu: ironía, actitú molona y chuleta, cantares cenciellos y pegañosos más que pegadizos… Ye puru disfrute y diversión.
Esti pompeyanu de nome Giuseppe Chierchia ye conocíu mundialmente pol so ésitu ‘Ma quale idea’, de cuyes rentes sigui viviendo entá esti home. Ye, de fechu, una de les llestres más elaboraes y celebres non ya del Italo Disco, sinon del disco, el funky mundial. Un poco a rebufu de Shaft, ‘Ma quale idea’ ye la cume artística d’un home que ya vinía ufiertando ironía dende años atrás, con cantares menos conocíos nel resto d’Europa y más ‘poperos’ pero realmente prestosos como ‘Fammi un panino’ (¿Faime un bocata?) y la rellumante ‘Un concerto da Strapazzo’, dambes perprestoses, daveres.
Nesti videu, vos dexo l’aggiornamento de ‘Ma quale Idea’ que restolaron en comuña l’arxentinu dj Kun y el propio Pino D’Angiò. L’adaptación paezme afayadiza, caltién l’espiritu coñón y vese buen rollu ente los dos artistes. Mola.
Hai más adaptaciones, como la de Flaminio Maphia, qu’algamó va unos añinos un bultable ésitu n’Italia, anque a mín paezme más una caricatura qu’una versión que caltenga’l tonu orixinal. Nin tampoco podemos escaecer el sampleáu fechu por Madison Avenue pal so cantar ‘Don’t call me baby’, que sonara abondo va un tiempu.
Si bien los La Bionda son los pas del Italo Disco, lo cierto ye que nun se-y pue negar la influencia que tuvo, y caltién, el gran compositor, productor y intérprete italianu Giorgio Moroder. Esti home ye ún de los dioses, non yá del Italo Disco, sinon que tamién lo ye del Disco con toles lletres. Na so web podéis atopar la bultable llista d’estrelles setenteres y ochenteres a les que produzo, y les bandes sonores que firma. De dalguna manera, Moroder ye l’talianu nel que se fixaben los demás, la guía pela que desenvolver l’estilu, les téuniques que bien lluéu diben dar llugar al Italo Disco.
Ye impagable esti videu promocional, nel que desplica delles posibilidaes de la entá naciente música electrónica.
Estos dos paisanos son La Bionda, AKA ‘D.D. Sound’. Carmelo y Michelangelo La Bionda foron dos visionarios, dos flipaos que nalaben ente soníos electrónicos, la música de la Motown y el gustu pol esquiyama de los setenta hasta convertise en unos de los músicos más molones de la so época. Col tiempu, foron dando-y forma’l so estilu y abriendo puertes a otros italianos que se sumaben a la moda disco Italia. Acabaríen como productores nos ochenta, detrás de los más grandes ésitos del xéneru col dúu Righeira. Anguaño dizse que rexenten unos estudios de grabación en Milán. Equí tenéis un exemplu de la so música: el so grande succeso ‘One for you, one for me’.
Calca equí p'amosar conteníu dende YouTube. Consulta la política de privacidá de YouTube.
Depués de pensar en delles opciones, quédome con dedicar lo que resta de mes al estudiu del Italo Disco, etiqueta musical gayolera y positiva non del too bien definía, pues pa dalgunos zárrase namás nes llendes italianes de la primera mitá de los ochenta, y pa otros abarca dende metanes los setenta hasta lo 90 en toa Europa. De fechu, la belga Kate Ryan y sus versiones del ‘Ella elle l’a’ y del ‘Voyage, voyage’ vien a amosar que’l Italo Disco, auténticu tueru del Euro dance, entá ta mui vivo (anque seya cola estroza d’esta maravía de France Gall o col orixinal de la I-NI-GUA-LA-BLE Desireless).
Sicasí, como cuido que pa cualisquier materia na que se vaya centrar ún, se tien que tener un conocimientu previu afayadizu, equí vos apurro unes mínimes indicaciones pa que vayáis preparandovos pa un marzu de lo más chulo.
Calca equí p'amosar conteníu dende YouTube. Consulta la política de privacidá de YouTube.
28 de Febreru de 2009 por Asturian Weird Foundation
Y con esti post vamos piesllar el mes Hello Kitty de la Asturian Weird Foundation: falando de la Hello Kitty nun, obra del artista pop uruguaxo Martín Sastre.
La historia de la ‘Hello Kitty nun’ a la que fizo referencia l’ayalgueru va unos díes, ye la de la ‘performans’ que se montó Martín Sastre pa llamar l’atención del so programa ‘Apadrina a un artista latinoamericano’ de la so fundación en favor de los artistes superprobes. La cosa foi que un paisa, antroxáu de monxa Hello Kitty, llantóse delantre la casa de Madonna en Londres pa dexar nidio que Madonna ye una artista llatinoamericana y que, per ende, ye bona idea apadrinar artistes llatinoamericanos.
El casu ye que Martín Sastre, que caltién esa fundación pol arte superprobe, ye un peazo d’artista que mos dexa videos como los que tien n’amuesa nel so web, y que respuende a dalgo tan cenciello como que la muerte de Lady Di, la boda del príncipe Charles y la muerte de Rainiero, ente otros fechos históricos, nun son cosa de la casualidá.
Esti Martín Sastre vien de facese, de fechu, un videu pa Fangoria, que vien paez que lu apadrinó con gustu.
28 de Febreru de 2009 por Asturian Weird Foundation
Enantes de qu’acabe el mes, y tamos a piques, fadré la pertinente referencia a la Hello Kitty nun qu’espera l’ayalgueru (de fechu, foi la imaxe d’esta monxa perprestoxa la qu’inpiró esti mes Hello Kitty de la fundacion). Sicasí, enantes vamos zarrar esti percorríu pel mu8ndu Hello Kitty coles últimes semeyes que llegaron a la nueva redacción.
Esto, acabante de producise va unes hores, ye’l pasu de Hello Kitty pel Antroxu de Mieres.
Y esto que vien darréu, ye la estaya Hello Kitty nel H&M del Princedom Park de Siero.
Lo d’enriba son unos piyamines (convencí a la capitana pa que mercara’l d’enriba). Lo d’abaxo son los calcetos que caltién la mio capitana, y que compró tamién.
Estos dos paisanos son La Bionda, AKA ‘D.D. Sound’. Carmelo y Michelangelo La Bionda foron dos visionarios, dos flipaos que nalaben ente soníos electrónicos, la música de la Motown y el gustu pol esquiyama de los setenta hasta convertise en unos de los músicos más molones de la so época. Col tiempu, foron dando-y forma’l so estilu y abriendo puertes a otros italianos que se sumaben a la moda disco Italia. Acabaríen como productores nos ochenta, detrás de los más grandes ésitos del xéneru col dúu Righeira. Anguaño dizse que rexenten unos estudios de grabación en Milán. Equí tenéis un exemplu de la so música: el so grande succeso ‘One for you, one for me’.
